FARC no ke bolbe negoshá.


Si ta pa e movimentu di gueria kolombiano FARC, nan lo no bolbe negoshá un akuerdo di pas. Pa FARC lo no por adaptá e teksto original, pero no muchu mas. Asina e miembro ulandes di FARC, Tanja Nijmeijer a bisa den un deklarashon pa e medio ulandes Nieuwsuur. Resientemente pueblo colombiano a rechasá e akuerdo di pas, ku gobièrnu i FARC a negoshá durante kuater aña largu. E prinsipio di akuerdo ta muchu fofo pa e pueblo. Sigur 63% di e pueblo no a bai vota durante e referèndùm i esaki según Nijmeijer ta haña hopi preokupante. FARC ta haña ku nan a hasi sufisiente konseshon. Segun e miembro di FARC, gobièrnu no a duna sufisiente splikashon na pueblo, di kiko eksaktamente tin den e akuerdo. “Si portanan sera pa nos, e orei nos ta bai bèk den selva i nos ta bai lucha atrobe,” asina el a splika.

Komo un forma di speransa pa tòg yega un solushon duradero, presidente Juan Manuel Santos, a alargá “sese-de-fuego” (paro di tira) te ku fin di aña. Pa su esfuersonan den e proseso, Santos a risibí e premio Nóbel di pas.

Riba e pregunta na Mijmeijer, si e ta deseá na bolbe Ulanda, el a kontestá: "Mi no a bai Colombia pa hasi guera. Tin hopi pa konstruí akinan. Lo mi ta tin gana di mira mi famia na Ulanda, pero esei no ta mi prioridat”. Nijmeijer ta na Cuba. Tin un demanda di búskeda di parti di Merka kontra di dje. Colombia a primintié ku lo dun’é amnestia, pero no ta mucha kla si e lo ta liber-liber den otro pais tambe.