Volkswagen ta paga 1.2 bion dòler na dilernan di outo merikano.


E fabrikante di outo Volkswagen ta bai paga 1.2 bion dòler na 652 diler di outo merikano, ku a haña nan den problema komo konsekuensha di e skandal di disel.

Den un investigashon publiká dia 18 di sèptèmber 2015 pa e agensia di protekshon ambiental merikano (Environmental Protection Agency, EPA) i California Air Resources Board (CARB), a keda determiná ku Volkswagen, ku ta e di dos fabrikante di outo mas grandi na mundu, ta eskivá e eksigensianan skèrpi di medio ambiente pa ku nan motornan disel. E

motornan ta bini ku un ‘software’, ku ta sòru pa e emishon (loke ta sali for di e mòfel), ku ta midi durante kòntròl den garashi, ta ménos dañino ku den uso normal di e outo riba kaya.

Volkswagen entretantu a atmití ku nan ta usa e ‘software’.

Na fin di ougùstùs Volkswagen a firma un akuerdo dilanti tribunal di hustisia na San Francisco. E dilernan ta risibí e 18 lunanan benidero 1.85 mion dòler. Ademas di esei Volkswagen ta bai kumpra tur e softwarenan bèk, ku a bin ku froude den nan, for di e dilernan. E dilernan di outo tin ya kaba un aña ku problema ku e outonan di e marka. Outonan Volkswagen ku tin motor di disel ta sòru pa muchu polushon i no ta bende. Ainda mester lucha ku e daño di imagen dje kompania, loke no ta na fabor di benta. E suma di 1.2 bion ta bin riba e 14.7 bion dòler ku ainda Volkswagen mester paga Merka.