Durante e periodo di 16 pa 27 di sèptèmber Fundashon pa Konsumidó a bishitá 22 negoshi pa kompará preis di fruta i bèrdura. A selektá 46 produkto pa hasi e komparashon mas strukturá. A kompará preis di entre otro batata, batata dushi, yuka, maishi, lamunchi, pampuna, banana, konofló, siboyo, siboyo kòrá, tomati, promentòn, spinazi, awakati, broccoli, prei, wòrtel, anasa, kiwi, bakoba, mandarein, pera, plùm, apel, apelsina, milon, mango, papaya, patia i drùif. Centrum Piscadera a sali e supermerkado mihó surtí den fruta i bèrdura. Di e 46 produktonan selektá, Centrum Piscadera tabatin 31. Bon Biní Supermarket i Mangusa Rio Canario ta sigui ku 30 di e 46 produktonan. I na di tres lugá ta bin Mangusa Hypermarket ku tabatin 29 di e 46 produktonan. Pa loke ta mihó preis, Mangusa Rio Canario i Hypermarket, Vreugdenhil i Minimarket Queens a sali na promé lugá ku 8 produkto. Sigui pa Centrum Piscadera ku 7 produkto i Centrum Mahaai ku 6 produkto. Fundashon pa Konsumidó ta pidi tur hende pa paga bon tinu, ora ta kumpra fruta i bèrdura, pasó nos ta biba den klima kalor. Pa e motibu aki hopi biaha fruta i bèrdura por daña masha lihé.