Miéntras ku partidonan a firma un akuerdo di disponibilidat, ya ta sigur kaba ku Hensley Koeiman lo bira e próksimo Minister Presidente pa pais Kòrsou. Asina lider di kampaña Kenneth Gijsbertha a bisa prensa despues di e enkuentro entre partidonan. “Nos no a diskutí tokante otro ministernan ainda, pasó ta ora partidonan bini huntu atrobe lo bai papia riba repartishon di kartera,” asina Gijsbertha a deklará. Ta keda e ora ei na kada partido ken nan lo skohe komo kandidato pa e kartera. Djamars atardi, Gijsbertha tin un bishitá planiá serka gobernadó, den kuá ofisialmente e lo keda nombrá komo informadó. Sinembargo, konsiderando ku ya tin un palabrashon entre partidonan, Gijsbertha no sá si mesora gobernadó lo nombré komo informadó/formadó.