Sekretario-General di Nashonnan Uní, Ban Ki-moon, a hasi un petishon pa rekoudá 120 mion dòler pa yuda Haiti. Despues di e pasashi di orkan Matthew, e país a sufri hopi daño, miéntras ku ta kalkulá ku riba mil hende ya a pèrdè nan bida. E oumento di e kantidat di víktimanan, kombiná ku komienso di e temporada di áwaseru, a pone ku Nashonnan Uní urgi paisnan pa hopi yudansa urgente. Partikularmente e fondo di yudansa pa mucha (UN Children’s Fund - UNICEF) a bati alarma pa motibu di e menasa serio pa malesanan serka muchanan, debí na awa kontaminá den e áreanan mas afektá.
“Por lo ménos 1.4 mion hende tin mester di sosten urgente. Algun pueblo i barionan a praktikamente a disparsé for di mapa. Kosecha i reserva di kuminda a keda destruí. Tin sigur 300 skol ku a sufri daño enorme”, asina Ban Ki-moon a konta periodistanan durante un enkuentro na e ofisina prinsipal di Nashonnan Uní. El a ekspresá su mas profundo kondolensia i simpatia na esnan afektá pa e orkan. Ban Ki-moon a bisa ku e kantidat di esnan afektá i e nesesidatnan ta sigui krese, segun mas área ta ta bin aserka. Ademas tenshon tambe ta subi debí ku e hendenan ta spera yudansa. “Un reakshon masivo ta nesesario i urgente”, Ban Ki-moon a bisa. Ya timnan di Nashonnan Uní ta trahando ku outoridatnan lokal pa evaluá e nesesidatnan.