
E di dos debate entre Donald Trump i Hillary Clinton pa presidensia merikano a start den lus, di un video di 2005 ku a lèk algun dia promé, den kuá Trump ta ekspresá su mes di forma seksista tokante hende muhé. Na 2005, Trump a partisipá na un programa di televishon ku presentadó Billy Bush. Nan dos mester a baha for di un bùs, pa bai traha riba e serie di Days of our Lives, den kuá Trump tabatin un ròl komo invitado. Promé ku e porta di e bùs a habri, e mikrófono tabata sendé i den un frakshon chikí di zonido, por tende Trump ekspresá su mes di forma seksista i ofensivo tokante di hende muhé. Republikanonan prominente a laga Trump kai promé ku e debate. E kandidato pa vicepresidente di Trump tambe a tuma distansha for di Trump.
E atakenan relashoná ku e tópiko a start for di tempran den e debate, sinembargo el a sa di kita e atenshon for di esei. Trump a splika su ekspreshonnan komo “kombersashon di den baño” i a kulpa Hillary Clinton di nobo di a laga míles i míles di “email” disparsé deliberadamente. Banda di esei, el a akusá, e moderadónan, Anderson Cooper di CNN i Martha Raddatz di ABC, di parsialidat. "Mi tin gana di sa, Anderson, dikon bo no ta kuminsá ku e “emailnan,” asina Trump a puntra. Segun e magnate di propiedat inmóbil, e anochi tabata “tres kontra unu”. “Pues e sí por reakshoná i ami nò, esaki no ta hustu”, e kandidato republikano a reklama. El a krea e impreshon ku Clinton tabata haña mas tempu pa papia.

Trump a para remarkenan krítiko, dor di kambia konstantemente di tema. El a kuminsá papia tokante e guera kontra di ISIS i e skandal di emailnan di Clinton. “Ora mi gana, mi ta bai sòru ku ta bini un fiskal pa investigá bo situashon,” Donald Trump a bisa Clinton. “Bo mester tin bèrgwensa.” Clinton a bisa ku ta bon ku Trump no ta esun ku goberná, riba kuá Trump a reakshoná : “paso e orei abo lo den prizòn.” Trump tabata interumpí Clinton varios biaha, kontra e indikashon di e moderadónan.