New York ta invertí 5 mion dòler den produktornan femenino di teatro i pelíkula.


Siudat di New York City ta bai invertí sinku mion dòler den un fondo pa produktornan femenino di teatro i pelíkula. Esaki mester stimulá e igualdat dilanti i tras di kámara, den pelíkula i televishon i riba tarima. Asina The New York Times a publiká. New York ta e promé siudat den e pais, ku a hinka un programa den otro pa yuda hende muhé produktornan ku ta traha teatro i pelíkula. "Nos no ta mira asina tantu hende muhé den tòp di nan speshalidat, manera ta e kaso ku hende hòmbernan,” asina Julie Menin, hefe di e buro pa media i entretenementu na siudat di New York a bisa. E 5 mion dòler lo ta disponibel pa hende muhénan ku ta hasi proyekto pa hende muhé òf tokante di hende muhé. E plaka ta bai tambe pa direktornan di esena, pa asina por lansa nan istorianan i tambe pone nan den kontakto ku otro invershonistanan. “Investigashonnan a indiká ku finansiamentu ta un opstákulo masha grandi pa produktornan di pelíkula femenino”, sigun Menin. Huntu ku esei lo bin un kompetensia di outornan, den kual e dos ganadónan lo por skibi un “pilot” pa NYC Life, ku ta e kanal di televishon di e siudat. Asistensia den produkshon di e seri ta bin di studiantenan di The Feirstein Graduate School of Cinema.