Alumnonan mester a bandoná e skol pa motibu di huma.


Skol Juan Pablo Duarte na Buena Vista mester a sera su portanan atrobe djaluna pa motibu di molèster di huma di Refineria Isla. Masomenos mitar di un, a manda tur alumno i dosentenan kas. Algun maestro a bira malu, asina bosero di ministerio di enseñansa, Tico Vos a konfirmá. E bosero a mèldu ku refineria no a informá nan tokante di e situashon, loke e ta lamentá enormemente. Bosero di Isla, Henny Cornelia a deklará ku e emishon di huma pretu di djaluna, tabata pa motibu ku e kompresor di Wetgas a kai afó, dor di un sistema di seguridat outomátiko. “Nan a pone solamente medionan di komunikashon na altura. O sea, nan ta atendé únikamente ku relashonnan públiko i no ku e situashon rondó di skol i e muchanan. Vos tatei atardi na skol i a palabrá, ken, si esei ta nesesario, por poné responsabel pa e gastunan di transporte. E alumnonan e biaha aki por a keda transportá, pero por sosodé tambe ku esei lo no por a pasa mas tempran den dia i ku lo mester evakuá e alumnonan i hiba nan temporalmente otro kaminda, te ora nan mayornan por buska nan yunan. “E polushonadó mester kubri e gastunan aki,” según Vos. E skol situá na Santo Domingoweg, regularmente tin molèster di holó stinki i/òf huma di Isla. E bosero ta spera ku por finalisá e plan di evakuashon e siman aki.