Sinku hòmber a atraká Kim Kardasian na Paris i bai ku miones na prenda.


Den wikènt sinku hòmber a atraká e modelo Kim Kardasian na Fransia i bai ku vários artikulo for di su vila. Tabata masomenos 3or di mardugá ora sinku hòmber a drenta e vila di Kardasian na París. E hòmbernan tabata bistí na polis, asina e agensia di notisia Reuters ta informá. Nan a hòrta miones na prenda i joya. Den un kaha di prenda tabatin un renchi na balor di kuater mion euro. Ademas vários otro joya na balor di seis mion euro. Bosero di e modelo a bisa CNN ku Kim a spanta hopi pero no a keda heridá. Di otro banda un reportero franses di Sky News ta bisa ku e atrakadónan lo a mara Kardasian durante e akto. Según TMZ, dos di e atrakadónan lo a bui Kim i tapa su boka. Nan lo a hink'e den badkùip miéntras e modelo tabata roga pa nan no mat'é pasó e tin dos yu chikí na kas. Aparentemente e atrakadónan tabata sa bon kiko nan ta hasiendo. Na 2014 kaba, Kim a yega di keda na e vila akí na París.

Kanyne West mester a para un konsierto ku e tabatin na e momentu ei na New York. West tabata den un presentashon na Meadows Music Festival, ora ku mei mei di e tema "Heartless", un di su kolaboradónan a hal'é patras di tarima pa dun'é e notisia. "Mi ta lamentá hopi, pero mi mester para mi presentashon. A surgi un situashon di emergensia den mi famia," asina e artista a bisa e públiko, miéntras tabata falta masomenos dies minüt pa su show kaba.