Parlamentario Elmer Wilsoe ke klaridat di Ministerio Públiko.


A base di artíkulo 56 di Kódigo di Prosedura Penal, parlamentario pa Pueblo Soberano Elmer "Kadé" Wilsoe, a pidi Wes Komisario pa obligá Ministerio Públiko pa sera e investigashon den su kaso. Ku esaki e ke haña klaridat si e ta sospechoso sí òf nò den kaso Magnus, den kuá ta trata e outornan intelektual den asesinato di parlamentario Helmin Wiels (q.e.p.d.). Ta dependé awor di e desishon di Wes Komisario kiko ta bai pasa. Den pasado tipo di kasonan asina a tuma lugá. Na Boneiru por ehèmpel Wes Komisario a yega di obligá Ministerio Públiko pa sera un kaso. E tempu ei, debí ku Ministerio Públiko no por a alkansá e fecha stipulá, nan a sepone e kaso i no a kontinuá mas ku pèrsiguishon di e sospechosonan.

Pa djaluna 3 di òktober Wes Komisario ta tuma un desishon riba e petishon di Wilsoe.