Mester a evakuá sentenáres di hende djasabra na parti di wèst di Mèksiko pa motibu di erupshon di volkan Colima. Outoridatnan a trese 350 habitante di e pueblonan La Yerbabuena i La Becerrera na luganan mas sigur. Den e provinsia Jalisco, djis pegá ei banda, tambe mester a evakuá hendenan debí na e desaster natural. Lava tabata kore for di volkan bini abou i e volkan tabata skupi shinishi i huma diki den laira. E volkan ta keda 700 km na wèst di siudat di Mèksiko. Den e país e volkan ta mihó konosí komo Volkan di Kandela.