Desishon di gobièrnu ta hasi daño na selekshon di futbòl.


E desishon di gobièrnu pa pone elekshon riba mésun dia ku selekshon nashonal di fútbòl ta hunga, ta inkomprendibel pa Eldon "Peppie" Sulvaran. Segun e fanátiko di fútbòl, e partido ta sumamente importante pa Kòrsou buska klasifikashon den Caribbean Cup, ku alabes lo nifiká klasifikashon den Golden Cup. Biones di hende rònt mundu ta mira Golden Cup. "Tin 15 biaha mas ta tantu hende rònt mundu ku ta wak Golden Cup, kompará ku Serie Mundial di beisbòl," segun Sulvaran. Komo tal presensia di Kòrsou den e torneo lo ta un propaganda impagabel. Ademas den kaso di klasifikashon, FFK lo por kobra miones di dòler na derechi di transmishon. E sèn aki por bolbe invertí den futbòl hubenil. Segun Sulvaran, e desishon di gobièrnu lo hasi daño inmenso na e selekshon ku lo hunga na kas sin gran públiko.