Den aña 90 Donald Trump a violá e bòikòt di komersio kontra Cuba.


Donald Trump a violá e bòikòt komersial kontra Cuba den añanan 90, asina Newsweek a publiká siman pasá. E revelashon ta eksplosivo, pasó kubanonan di mayor edat na Merka, ku anti-Castro, mayoria biaha ta vota pa e partido Republikano. Na aña 1988 Donald Trump a manda un delegashon Cuba pa eksplorá si ta tin oportunidat pa hasi negoshi riba e isla komunista, den kaso ku suavisá o revoká e embargo, asina un fuente ku e tempu ei tabata traha pa un di e empresanan di Trump, a deklará.

Den un konstrukshon finansiero, tabata pasa e plaka pa e biahe (masomenos 68.000 dòler) pa Cuba, via un empresa di konsulta i ku na final tabata registrá esaki via di un instituto karitativo. Tabata usa tipo di konstrukshonnan finansiero asina, debí ku mishonnan humanitario tabata entre e poko eksepshonnan aseptá, pa por a saka plaka for di Cuba.No muchu largu despues di e biahe, Trump a purba pa promé bia pa bira presidente di Merka, dor di pone su mes eligibel komo kandidato pa e Partido Reformá.

E bionario Ross Perot a funda e partido aki, despues ku el a trata na drenta kas Blanku komo presidente na 1992. Den su promé diskurso, na novèmber 1999 na Miami, Donald Trump a primintí un grupo di eksiliadonan kubano ku e tabata pro e bòikòt i ku nunka lo por saka sèn for di Cuba, tanten Fidel Castro ta na mando.