Debí na elekshon, djarason 5 i djaweps 6 di òktober no tin skol.


Durante un konferensia di prensa djasabra atardi, Promé Minister Ben Whiteman a reafirmá ku e fecha nobo di elekshon ta djarason 5 di òktober. Minister di Enseñansa Irene Dick a splika, ku debí ku tin vários maestro di skol ku ta yuda den e proseso di elekshon, a disidí ku djarason 5 i djaweps 6 di òktober lo no tin skol. Segun Promé Minister Whiteman, no ta sin mas por kambia fecha di elekshon. Den kaso di djabièrnè ku a pasa, ta debí na “force majeure”. Posponé elekshon ta kompetensia di Konseho Supremo Elektoral i miéntras pa determiná un fecha nobo esaki ta responsabilidat di gobièrnu. Gobièrnu no tabata na altura ku tabatin wega di selekshon nashonal di fútbòl riba djarason 5 di òktober, pero ta dispuesto na yuda pa mira kon por sostené e partido di fútbòl. Entre otro gobièrnu lo yuda ku asistensia di kuerponan uniformá pa e partido di fútbòl.

Minister di Enseñansa Irene Dick a splika ku a tene kuenta ku e aspekto di kansansio di e maestronan di skol ku ta yuda na urnanan durante elekshon i komo tal gobièrnu a duna liber riba djaweps tambe.

Raymond “Pacheco” Römer di Konseho Supremo Elektoral a splika ku durante e enkuentro ku tabatin ku partidonan polítiko tokante e fecha nobo pa elekshon, tur partido a bai di akuerdo. Ademas e presidente di KSE a bisa ku Kranshi a habri djasabra i mas ku 200 persona a pasa buska nan karchi di vota. Djaluna dia 3 i djamars dia 4 di òktober entre 4:30 pa 7pm por buska karchi di vota ainda na Kranshi, dado kaso ku no a haña esaki na kas. Na mes momentu por traha sedula tambe.