Matthew a bira orkan kategoria # 4 i a trese hopi áwaseru pa Banda 'Bou. (FOTO/VIDEO)


Den oranan di atardi, National Hurricane Centre a anunsiá ku Matthew entretantu a bira un orkan kategoria 4 i ta bira orkan poderoso riba e skala di Saffir-Simpson Hurricane Wind Scale. Djabièrnè i djasabra ta pronóstiká ku e sentro lo move nòrt riba laman di Karibe sentral. Djadumingu e lo yega hopi serka di Jamaica. P’esei mes tin un alerta di orkan emití na Jamaica. Pues ya e sistema ta alehá mas i mas for di e area di Kòrsou, Aruba i Boneiru, pero el a laga basta awaseru kai i molèster. Segun e último boletin di Rampenstaf, e situashon na Korsou ta normalisando. Durante un evaluashon a determina ku e peliger pa mas awaseru i bientu fuerte a mengua hopi. Bandabou a risibi awe bastante awaseru kompara ku otro partinan di Kòrsou. Servisio Metreológiko a midi na e siguiente areanan : Hofi Mango 48 milimeter

Jeremi 55 milimeter Sumbu 63 milimeter Hato 1.9 milimeter Santa Maria 1.8 milimeter Spaanse Water 1.4 milimeter Punda 4.8 milimeter.

Brantwer mester a drenta den akshon kuater biaha, debí na pa palunan ku a kai. Polis tambe mester a aktuá na momentu ku algun hobenan tabata landa den laman brutu na Playa Kanoa.

Kustwacht no a raporta nada partikular.

Mester a laga sera algu playa debí na laman hopi brutu. Entre otro a sera Playa Kenepa, Daaibooi, Playa Kanoa, Boka Tabla, Lagun, Watamula i Playa Kalki. Lo sigui monitor e playanan pa mira si por habri esakinan bèk pa públiko den kurso di djasabra.

ABC Busbedrijf ta kore te ku djasabra awenochi 7or. E servisio di fèri entre Otrobanda i Punda ta bèk den servisio. Despues di 11or di anochi lo tin un bus ta kore entre Punda i Otrabanda. Djasabra mainta lo evalua si ta trese Emmabrug bek den boka di haf.

Rampenstaf ta keda den estado di alerta i lo drenta den akshon si ta nesesario. Djasabra mainta lo reuní pa evalua e situashon.