Alicia Machado ta haña ku Donald Trump ta ònbeskòp.


Èks mis universo Alicia Machado a reakshoná riba Donald Trump yamando e kandidato republikano agresivo i ònbeskòp. Machado a representá Venezuela na 1996 den e sertámen di Mis Universo ku e tempu ei tabata kai bou di Trump. Aparentemente Trump a yam'é Mis "ama di kas" i "Miss Piggy", na momento ku e la subi di peso despues di e sertámen. "E tabata un mal hende ku mi. Mi komunidat latino no por aseptá mas insulto. No mas insulto pa hende muhé. Mi konosé señor Trump hopi bon i mi por mira ku e la keda e mesun persona ku e tabata 20 aña pasa”, asina Machado a bisa. Na su turno Trump a reakshoná ku Machado tabata e gañadó i pa e motibu ei, e hecho ku e la subi di peso asina hopi, a bira un problema grandi. I no solamente esei, e tabatin un aktitut malu tambe, segun Trump. "Awor Hillary a bai busk'é i ta hasi manera ta algu aktual. E kos aki a pasa hopi aña pasa," Donald Trump a finalisá.