
Durante un konferensia di prensa ku a tuma lugá awe tardi, Promé Minister Ben Whiteman a splika ku gobiernu a disidí pa kontinuá ku elekshon djarason 5 di òktober. Esaki debí na efektonan ku pasashi di orkan Mattew lo trese kuné. Minister Whiteman a splika ku nan a reuni ku Servisio Meteorológiko i Konseho Supremo Elektoral promé ku a yega na e desishon. Ademas gobièrnu di Kòrsou a disidí pa duna empleadonan públiko liber i urgi sektor privá tambe pa hasi mesun kos. A disidí tambe ku djabièrnè no tin skol. Entretantu a aktivá e Emergency Operational Centre na Brievengat.

Dr.Albert Martis di Meteo a splika ku Mattew a bira orkan mas tempran ku a antisipá. E sistema lo pasa na parti nort di nos isla den oranan di djaweps anochi bai kue djabièrnè. Den oranan di djabièrnè mardugá, mèrdia i djabièrnè anochi ta spera ku mas áwaseru lo kai. Segun dr.Martis e áwaseru ku a kai djaweps den dia tabata entre 30 pa 45 milimeter, miéntras ku ta spera ku pasashi di Mattew ku e kantidat lo ta masomenos 150 milimeter. E echo ku e orkan a baha di spit ta pone ku efektonan di àwaseru lo por ta mas pisá debi ku e sistema ta move mas slow. Aparte ku laman lo bira brutu, Kòrsou por spera bientunan di tormenta, dr.Martis a splika.

Raymond “Pacheco” Römer, presidente di Konseho Supremo Elektoral a splika ku durante un reunion ku nan tabatin ku tur partido polítiko den kurso di dia, tur a mustra komprenshon pa e situashon. Tur partido a bai di akuerdo pa posponé elekshon te djarason 5 di òktober. Den e proksimo oranan, gobièrnu lo sigui vigilá e situashon i lo keda informá pueblo via medionan di komunikashon.