KSE a kontrolá tur 120 mil papel di vota.


Despues ku Konseho Supremo Elektoral (KSE) a risibí un karta di lider polítiko di Movemento Futuro Kòrsou tokante papelnan di vota pa elekshon di 30 sèptèmber, KSE a saka un komunikado ofisial pa aklará un ke otro i asina evitá konfushon. Asemas KSE ta enfatisá ku organisashon di elekshon ta korektamente hasí.

Debí na e paro general di 15 sèptèmber último, a surgi un retraso di dos dia den imprenta di e papelnan. Pa por a kumpli debidamente ku e trabou pa terminá e papelnan di vota na tempu mester a pura e proseso i esaki a okashoná mas fayo ku normalmente. Na momentu ku Konseho Supremo Elektoral a konstatá fayo den e papelnan di vota, a opta pa segurá e proseso dor di hasi un kòntròl di 100%, durante e fin di siman ku ta tras di lomba. Pues un trabou inmenso a tuma lugá for di djasabra mainta te djadomingu anochi 8or pa kontrolá tur 120 mil papel di vota.

Ta kustumber ku semper tin un kantidat di papel di vota ku ta sali malu for di imprenta, pero e biaha aki esei a resultá muchu mas tantu ku normal. Durante e kòntròl a eliminá tur papel di vota ku no tabata adekuá i asina sigurá ku tur papel di vota ku ta bai usa djabièrnè awor, ta di kalidat korekto i konforme na loke lei ta rekerí.

Konseho Supremo Elektoral ta suprayá ku tur loke ku ta keda hasí den preparashon pa elekshon 2016, ta sosodé korekto ku e solo ophetivo pa salbarguardia e proseso demokrátiko den nos pais.