Hillary Clinton a keda konsiderá komo e ganadó di e debate entre e dos kandidatonan pa presidensia merikano. 62% di personanan ku a wak e debate ta di opinion ku Hillary a hasi un mihó trabou, miéntras 27% ta di opinion ku Donald Trump tabata mihoó. Esaki segun un enkuesta di CNN/ORC serka votadónan ku a sintonisá e debate. Votadónan ku a sigui e debate a bisa ku Clinton a ekspresá su vishon mas kla ku Trump i ku e tabatin miho konosementu di problemanan. Tambe Clinton a hasi un miho trabou den papia di preokupashonnan ku votadó por tin tokante su potensial presidensia. 53% di e votadónan a haña Clinton mas sinsero, kontrali na 40% serka Donald Trump. Trump a skor mas haltu (56%) den e tempu ku el a pasa ta ataka su kontrinkante. Mitar di esnan den e enkuesta a bisa ku e debate aki no a influensia pa ken nan lo vota. Esnan ku sí, e debate a influensia, a indiká ku probablemente nan lo vota pa Clinton. E enkuesta despues di e debate a inkluí entrevista ku 521 votadó registrá.