
Shimon Peres, anterior presidente di Israël, a muri na edat di 93 aña. Últimamente ya kaba su salú no tabata bon. Na yanüari el a keda hospitalisá ku problemanan di kurason. Peres a haña un markapaso, ya ku e tatin un defekto pa ku e ritmo di su kurason. Dia 13 di sèptèmber último mester a hib’é ku urgensia hòspital, debí na un “ictus serebral” ku sangramentu severo. Pa motibu di esaki el a sufri daño konsiderabel na su serebro. For di e momentu ei, el a keda interná den hospital na e siudat Ramat Gan. Den e último simannan su situashon a bai hopi atras. Djamars a drenta e notisia ku el a fayesé.
Simon Peres a nase na Polonia. Na 1994 el a risibí premio Nóbel di pas, pa su involvimentu den e akuerdo di pas ku e palestinonan na 1993. E tabata dos bia promé minister, miéntras ku di 2007 te 2014 e tabata presidente di su pais. Na 1995 Peres a sigui Yitzhak Rabin, ora esaki a keda asesiná. E puesto di presidente na Israel ta mas bien unu seremonial i pro forma. Despues di su renunsia, el a risibí varios kondekorashon internashonal pa su esfuerso den e proseso pa pas den Medio Oriente.