UTS NO ta duna number di telefòn di kliente na niun partido polítiko


Resientemente vários kliente di entre otro UTS a tuma nota di mensahe di partidonan polítiko ku nan ta risibí riba na telefòn sin a duna outorisashon pa esaki. Den un komunikado UTS ta splika ku nan a tuma nota di reklamo di klientenan ku ta kere ku UTS ta dunando sierto partido polítiko nan numbernan di telefòn pa nan hiba nan kampaña polítiko.

Esaki NO ta kuadra ku realidat. UTS no ta kontribuí den ningun forma ku esaki. E partidonan polítiko ta hasi uso di sierto sistemanan di robòt, ku purbando tur posibel kombinashon di number ku eksistí i wak kua ta pasa òf no. Sea ta yamada, via WhatsApp òf SMS. UTS no tin ningun influensia riba esaki i tampoko por kontrolá esaki.

Pa UTS, privasidat di su klientenan ta algu hopi sagrado i semper lo perkurá pa protehá esaki.