Hackersnan ta publiká informashon médiko di Nadal.


Pa di 4 bia den e simannan tras di lomba, un grupo di “hacker” a publiká informashon médiko konfidensial di algun atleta. Resientemente a publiká informashon di entre otro Rafael Nadal i Mo Farah. Den e di kuater parti di e publikashon ta menshoná un total 26 atleta di Argentina, Bèlgika, Burundi, Canada, Dinamarka, Fransia, Gran Bretaña, Hungria, Spaña i Estádos Unídos. Banda di tenista Nadal i 4 biaha kampion olímpiko Mo Farah, ta hasi menshon di entre otro e kampion di gòlf Justin Rose, remadó Helen Glover, landadó Laszlo Cseh i gimnasta Lauren Hernandez. E informashon ku a lèk ta mustra sertifikadonan médiko ku atletanan por pidi pa asina nan por sigui uza remedinan ku ta aparesé riba e listanan di supstansianan prohibí pa uzo. Tipo di sertifikadonan aki ta usual den deporte profeshonal. No tin prueba ku e atletanan a hasi algu robes. E grupo ku ta publiká e informashonnan ta yama su mes “Fancy Bears”. Den simannan anterior a públika informashon di e tenistanan Serena i Venus Williams, gimnasta Simone Biles i hungadó di basketbòl Elena Delle Donne. Segun e agensia anti-doping mundial WADA ta trata aki di hackernan ruso. Probablemente nan a hasi uzo di un kuenta di e Komité Olímpiko Internashonal pa por a yega na informashon médiko konfidensial.