Disney i Google ta intresá na kumpra Twitter.


Segun fuentenan anonimo, e konsorsio The Walt Disney Co. ta den konsulta ku konseheronan finansiero pa studia e posiblidat si e kompania por hasi un oferta serio pa tuma e popular servisio di mensahe riba retnan sosial Twitter. Ya tabata konosí ku e kompanianan Google i Salesforce tambe a mustra interes den kumpra Twitter, segun Bloomberg.

Segun Nick Bilton, ku a skibi un buki tokante e nasementu di Twitter, funshonarionan haltu den e gigante di retnan sosial, ta konsiderá Disney komo e kandidato ideal pa tuma Twitter over. Ademas e hecho ku Jack Dorsey, ku ta CEO di Twitter, ta miembro den gerensia di Disney, tambe ta faboresé un posibel akuerdo entre e dos kompanianan. Segun CNBC, Microsoft tambe ta un kandidato potensial pa tuma Twitter. Ta kalkulá ku den 30 pa 45 dia e benta di Twitter lo mester ta kla. Debi na e spekulashonnan tokante un posibel benta di e kompania, e akshonan di Twitter a subi enormemente den e dianan ku ta tras di lomba. Twitter ta konfrontá problema pa atraé klientenan nobo. Ketu bai e kompania ta sigui krese, sinembargo no mes fuerte ku su kompetidor Facebook. Aktualmente Twitter tin un balor di 15 miyart dòler riba merkado.