Ofisialmente a traspasá, e propiedatnan di Rif Resort Hotel NV, konosí na Kòrsou komo Curaçao Marriott Beach Hotel & Emerald Casino pa e doño nobo, Orco Groep òf sea Piscamar Beach Resort. Esaki a tuma lugá bou di supervishon di notario Henri Burgers. E entidat Piscamar Beach Resorta a keda fundá speshalmente pa e transakshon aki. Fin di ougùstùs a yega na un akuerdo ku Orco Groep pa benta di e propiedatnan. Pa benta di e hotèl ta tin un suma di 25 mion florin enbolbí. Banda di esei Orco Groep ta bai hinka 60 mion florin den renobashon di e hotèl. E meta ta pa drecha e hotèl di tal índole ku e ta kumpli ku e norman di Marriott. Banda di e renobashon, e doño nobo ke traha un piso mas riba e edifisio pa por amplia e kantidat di kambernan na 344. Debí na esaki no ta posibel mantené e hotèl habrí durante e renobashon. Grupo Orco a hasi palabrashonnan ku Marriott International ku e hotèl lo karga e nòmber Marriott despues di e renobashon, ku lo dura masomenos un aña i mei.
“A yega na un akuerdo pa tèrminashon di relashon laboral ku kada un di e trahadónan, konforme un plan prepará adelantá. Tur trahadó a keda tratá igual a base di e relashon di trabou ku nan tabatin i nan a haña kompensashon konforme esei. E pagonan ya a tuma lugá kaba konforme palabrashon,” asina Frans Heiligers, bosero di Rif Resort a indiká. El a bisa aserka ku huntu ku esun ku atendé e derechi di e sektor di hospitalidat na Kòrsou, Chata i Ministerio di Labor i Bienestar (SOAW), a organisá tambe un Marshe di Profeshon pa otro trabounan den e sektor di turismo lokal òf den otro sektornan.