No por stroba niun votadó di saka “stemfies”.


Den un komunikado di e grupo di abogadonan Eldon “Peppie” Sulvaran, Chester Peterson i Anthony Eustatius, ku ta forma Kòrsou Fuerte i Outonomo a splika ku no por stroba niun votadó pa saka potrèt di su voto. Saka portrèt ku telefòn den hòki di votashon no ta prohibí. Minister di Relashonnan den Reino Ronald Plasterk for di 29 di yanüari 2014 a anunsiá públikamente ku niun hende no por stroba otro di saka portrèt di su propio voto i repartí o kompartí esei ku es ku e ke. Ni komo medida di òrdu ni di ningun otro forma. Segun Kòrsou Fuerte i Outonomo, huridikamente e kos ta masha simpel. Nos legisladó formal, meskos ku ta e kaso na Hulanda, no a traha regla tokante uso di telefòn selular den lokalidat di votashon. P’esei minister Plasterk, a akordá i anunsiá repetidamente i ofisialmente ku uso di telefòn pa saka portrèt den hòki di votashon ta permití sin mas i ta kompletamente legal. Via su kuenta di Twitter, e mandatario a bisa ku e no ta manda niun hende bai hasié, pero tin mag di saka “stemfie”, manera e popularmente yamá na Ulanda.

Dia promé di mei 2014, den korte na Den Haag, Gobièrnu Hulandes te hasta a alegá, ku sakamentu di portrèt den hòki di votashon pa despues kompartí esei ku otronan tin hasta hopi bentaha. Esaki mirá for di e angulo di interes general pa ku elekshon. E siudadano, ku ta mustra otro kon ela vota, por ta te hasta un estímulo pa otronan bai vota. Mas importante ainda ta e libertat di ekspreshon. Esaki ta un derechi fundamental di tur votadó. E derechi aki ta enserá ku tur siudadano ta liber i e mes tin mag di disidí kon e ta anda ku su derechi di voto i kon e ta ekspresá esei.

Despues ku e la laga hasi investigashon hurídiko profundo, Minister di Relashon den Reino, Ronald Plasterk a enfatisá ku “stemfies” di ningun manera no ta prohibí. Un prohibishon pa saka portrèt òf mustra portrèt di riba ken a vota ta dirigí n’e siudadano i p’esei kualke prohibishon mester tin un base konkreto den un lei formal. Ni na Kòrsou, ni na Hulanda un lei asina no ta eksistí. P’esei tur hende ku pa motibunan netamente polítiko, ke spanta e yu di Kòrsou dor di bisa ku ta algu ilegal, no tin ningun base legal pa hasi esei. Kòrsou Fuerte i Outonomo ta lamentá ku un instansia manera Ministerio Públiko ta malusá nan poder di forma ilegal, dor di bisa ku votadónan no por saka “stemfies”. E organisashon ta eksigi tambe pa Konseho Supremo Elektoral rektifiká e mal informashon ku a duna na pueblo votadó di Korsou, paso no tin ningun base legal ni pa prohibí, ni pa listra ningun votadó ora e ta ehersé su derecho fundamental di vota òf ekspresá su mes.