Servisionan di Inteligensia Merikano ta investigá si un di e konseheronan di Donald Trump, a hiba kòmbersashonnan ku funshonarionan altu di Rusia riba tereno di polítika eksterior. Durante e kontakto nan lo a papia riba e posibilidat pa anulá sankshonnan ekonómiko, si e kandidato presidensial republikano keda eleigí komo presidente. Asina vários fuente a deklará na AFP. Ta trata di e empresario merikano Carter Page, ku tin relashonnan komersial na Rusia. Ya lo a palabrá e asuntu ku miembronan prominente di Kongreso merikano. Tabatin papiá kaba tokante un presunto intento di Moskú pa influensiá e elekshonnan presidensial na Merka. Lider di e demokratnan den Senado, Harry Reid a mustra e direktor di FBI, James Comey riba deklarashonnan tokante e kòmbersashonnan entre Page i personanan “altamente kualifiká” na Moskú den e lunanan ku a pasa. Lo por uza esakinan komo prueba di “relashonnan signifikante i preokupante” entre e kampaña di Trump i Kremlin. Reid a konsehá FBI pa investigá e desaroyo akí. Algun persona ku a haña informashon di e kaso, a keda sorprendí ora nan a tende di Page su kontaktonan ku Moskú. Nan ta mira esaki komo un posibel intento di e rusonan pa nan mina polítika di Merka. Ora Yahoo News a puntra pa un reakshon, FBI no a ninga ku nan sa di e kaso. "Nos tin esei riba nos radar. Nos ta wak e,” asina un kolaborador di FBI a bisa. Page ta un èks bankero di Merril Lynch. Awor e ta dirigí e ofisina di konseheria Global Energy Capital, ku ta dirigí su mes riba dilnan tokante petrolio i gas na Rusia i den Asia Sentral. Sigun AFP e lo a ninga na duna komentario riba e asuntu aki.