Doló di kurpa kousá pa Mayaro ta dura mas largu ku chikungunya.

E síntomanan di e vírus Mayaro ta komparabel ku esnan di chikungunya, pero por resultá den doló di kurpa pa un tempu mas largu, segun entomólogo Gisette Seferina. Sigun Seferina mester keda alerta pa un posibel brote. E vírus ta transferí dor di e mesun sangura ku a kousa e otro brotenan, esta e Aedes Aegypti. Mester tuma kombatimentu i prevenshon di e sangura aki hopi na serio pasó semper lo tin un vírus nobo ku por surgi. E sangura Aedes Aegypti por transferí sigur 15 diferente vírus i chikungunya ta un bon ehèmpel di kon lihé esaki por sosodé. Promé bia’ ku a deskubrí Mayaro tabata na 1954 na Trinidat i despues tambe na Brazil i otro partinan di Sur Amérika. Resien a konstatá e vírus aki serka un mucha na Haiti. No tin kaso di un epidemia pero si mester keda alerta, segun e eksperto.