Konsulado di Sürnam na Haiti a será porta temporalmente.

Debi na e fluho kresiente for di Haiti, Sürnam a disidí di imponé un visa obligatorio pa haitianonan, entrante 15 di sèptèmber. Sinembargo mas ku 100 haitiano ku kera bai Paramaribo, a haña portanan di konsulado será, ku un notifikashon ku ta bisa: “For di djamars, 13 di sèptèmber, Konsulado General di Sürnam na haiti ta sera te proksimo aviso. Nos ta diskulpá nos mes pa kualkier inkonvenensia ku esaki por kousa.”

Haitianonan ku tabata desapuntá, ku awor nan mester di un visa pa biaha pa Sürnam a reuní dilanti di e konsulado i a kritiká e gobièrnu i outoridatnan diplomátiko severamente. Hopi tabata puntra ta ken ta bai debolbé nan e sèn ku nan a paga kaba pa nan pasashi i reservashon pa kamber di hotèl, asina e korant Haiti Libre a raportá. Segun e emoshonnan di e multitut tabata subi i stèmnan tabata bira mas agitá, polis mester a intervení pa restourá òrdu i a plama e multitut rabiá for di otro, promé ku e kos por a sigui eskalá.