Ministerio Públiko ke pa hues prolongá prohibishon pa publiká dokumentunan den kaso Holleeder.


Ministerio Públiko na Ulanda ke pa hues prolongá prohibishon di publikashon di e testimonionan di Willem Holleeder i su rumannan Sonja i Astrid riba internèt. E prohibishon aktual ta kaba dia 8 di òktober awor. Ministerio Públiko a kuminsá un huisio sumario kontra Sebastiaan Beens, ku a pone e dokumentonan promé ku esei riba su wèpsait, pa prevení ku e ta bolbe hasié. Ministerio Públiko a pidi Beens boluntariamente pa desistí di bolbe publiká, pero segun su abogado Sébas Diekstra, su kliente Deens ta ninga esaki pa motibunan di prinsipio. “Mi kliente ta di opinion ku un prohibishon inkondishonal i sin limite, pa por publiká e deklarashonnan, ta un violashon kontra su derechinan", asina e abogado a bisa. “Esaki, paso ya kaba a skibi ampliamente riba e deklarashonnan i for di esakinan prensa a sita hopi kos kaba”, según abogado Diekstra.

Ministerio Públiko ke pa e prohibishon haña un prolongashon, paso den kaso kontra Willem Holleeder tin hopi testigu pa tende ainda. Segun Ministerio Públiko e investigashon pa saka afó Holleeder su involvimentu den likidashonnan, por bin seriamente den peliger si potensial testigunan promé ku nan interogashon lesa riba internèt kiko a keda deklará. E huisio sumario ta sirbi dia 30 di sèptèmber den Korte na Arnhem. E apelashon ku Beens a entamá kontra di e diktámen di aprel último ainda ta na vigor. E fondo pa libertat di prensa ta sostené Beens finansieramente, paso e formulashon pa e prohibishon pa publiká ta hopi amplio i lo por forma un limitashon pa esunan ku ta praktiká e profeshon di periodista. Na aña 2007 Willem Holleeder a haña un sentensia di 9 aña di prison pa vários kaso di ekstorshon, inkluso di Willem Endstra ku a keda likidá na 2004. El a sinta su kastigu i a sali liber dia 27 di yanüari 2012. Na 1983, Holleeder a haña un kastigu di 11 aña di prizòn, pa sekuestro di e magnate di serbes Freddy Heineken, durante kual ela pidi un suma di reskate di 16 mion euro.