top of page

Marina Ulandes a interseptá 2.000 kilo di kokaina.


E barku di marina ulandes Zr. Ms. Groningen a interseptá 2000 kilo di kokaina den karibe. Asina e komandante di kombatientenan marino, Rob Verkerk a mèldu den wikènt via Twitter. A entregá e sinku sospechosonan ku tabata a bordo di un boto di piskadó den kua e droga tabata skondí, na wardakosta merikano. Un avion di patruya merikano ku a mira e boto di piskadó i a manda un señal pa e barku di marina ulandes, segun Ministerio di Defensa a informá. Un ekipo merikano, ku tabata na bordo di e barku Zr.Ms.Groningen a baha bai den e boto sospechoso i a listra tur kaminda. Despues di 10 ora buska nan a bin haña e droga den un kompartimentu skondí. Durante e listramentu, mester a aktua basta lihé, ya ku e motor di e boto piskadó a paga i awa a kuminsá drenta e boto. Finalmente e boto piskadá a bin senk na e sitio. E droga tin un balor di masomenos 100 pa 140 mion euro riba kaya, e korant de Telegraaf ta raportá. Na yüni último tambe, e barku di marina Zr.Ms.Groningen, a interseptá un kargamentu di 400 kilo di kokaina, durante un patruyahe den awanan ku ta rondoná Sint Maarten, Sint Eustatius i Saba. Na prinsipio di sèptèmber tambe e barku a stroba un transporte di droga, di 300 kilo di kokaina a disparsé den fondo di laman. E último bia ku marina a interseptá un kargamentu di mas ku 1000 kilo di droga, tabata na òktober 2013. E tempu ei a haña 1.450 kilo di kokaina ku tabata na kaminda pa Repúblika Dominikana.

bottom of page