E aktris merikano Charmian Carr, ku a hunga e ròl di Liesl Von Trapp den e pelíkula “The Sound of Music” a fayesé na edat di 73 aña na Los Angeles. Su famia a partisipá esaki, segun e revista The Hollywood Reporter. Carr a fayesé djasabra pa motibu di komplikashonnan den un forma straño di demensia.
Carr tabatin 21 aña ora el a interpretá e yu muhé mayó di Von Trapp, ku a kanta e kansion “I Am Sixteen Going on Seventeen”. Despues di esei ela protagonisá den un pelíkula so mas. Tabata e pelikula “Evening Primrose” na 1966 huntu ku Anthony Perkins. El a bandoná e mundu di sine i bou di su mes nòmber el a kuminsá un empresa di diseño. Entre su klientenan tabatin entre otro Michael Jackson. Den e buki “Forever Liesl” ku el a publiká na 2000, Carr a konta su eksperenshanan durante filmashon di e pelíkula “The Sound of Music.” Un aña despues el a saka “Letters to Liesl” inspirá dor di míles di karta ku el a risibí di su fanatikonan.