top of page

A detené sospechoso atentado na New York durante tiroteo.

Polis merikano a detené un hòmber merikano di orígen Afgano di 28 aña ku ta e prinsipal sospecho den e investigashon di e eksploshonnan na New York djasabra último. Esaki ta loke alkalde di Elizabeth, New Jersey a deklara. Ahmad Khan Rahami a keda arestá despues di un balasera ku polis. Sigur ún polis a keda herida den e interkambio. Segun informe Rahami tambe a keda herida, pero no ta kla ainda si su heridanan ta di gravedat. Ta sospechá e hòmber huntu ku mas hende di e atentado. Polis a publiká un potrèt di e homber di New Jersey.

Nan a logra hañ’é dor di imprenta di dede ku tabatin riba un di e eksplosivonan ku no a detoná. Riba e telefon ku tabata konektá ku e eksplosivonan tambe tabatin informashon di Rahami. 29 hende a resultá herida a konsekuensha di e eksploshon den e bario Chelsea na New York. A haña un di dos eksplosivo na 27th Street. Promé ku esei un eksplosivo a bula na New Jersey. A haña tambe un tas ku 5 eksplosivo aden. Presidente Obama a bisa den un diskurso ku a detené un persona pero no por a konfirmá su identidat ainda. Rahami posiblemente ta parti di un sèl terorista. Segun gobernador di New York e atentando parse un akto di terorismo i posiblemente ku e kulpabelnan tin lasonan den eksterior.

bottom of page