Mayoria den parlamentu na St.Maarten ke un referèndum riba Independensia.


Un mayoria di parlamentarionan na St.Maarten tabata presente na un reunion di Komishon Sentral di Parlamento. Durante e reunion ku un delegashon di Independence for St.Maarten Foundation (ISMF) mayoria a bai di akuerdo pa sostené e fundashon. E fundashon ISMF ke tene un referèndum pa laga e pueblo disidí riba e tema di independensia. Presidente di ISMF, Jose Lake Jr. a bin ku e deseo pa hasi un konsulta popular riba e tema di independensia i a urgi miembronan di parlamento pa aktua rápido i hasi esaki posibel denter di un aña. Sekretaria di e fundashon, Dr. Rhoda Arrindell a tene un dikurso riba e tópiko “Placing St.Maarten back on the United Nations (UN) list of non-self-governing territories”, esta pa pone e isla di St.Maartin bèk riba e lista di Nashonnan Uní, komo teritorionan ku no tin nan propio gobièrnu. El a bisa ku ora Ulanda a kita e teritorio for di e lista na 1954, nan no a konsultá ku e pueblo di e isla. Arrindell a relatá dikon un paso asina lo no nifiká atraso, manera algun hende ta pretendé. El a mustra ku “outonomia di St. Maarten ta un mito”, miéntras e teritorio ainda ta un kolonia, ku no tin kontròl pa apuntá su gobernador, ni tampoko su asuntunan konstitushonal, ku nan ainda mester di aprobashon di e gobièrnu di Reino Ulandes. Arrindell a bisa aserka ku den asuntunan hudisial i finansiero, ta gobièrnu di Reino Ulades tin ultimo palabra. “What autonomy are we talking about?” (“Ki tipo di outonomia nos ta papia di dje”), el a puntra retórikamente.