top of page

Èks presidente Lula di Brazil akusá di korupshon.


Fiskal nan federal di Brazil a pidi un hues pa presentá kargonan di korupshon kontra èks presidente Luiz Inacio Lula da Silva. Nan ta akus'é di ta esun tras di un trama di korupshon ku a kosta e kompania di petrolio nashonal, Petrobras un pèrdida di 12.6 bion dòler. Nan ta investigando si Lula i su kasá no a deklará di ta propietario di un apartamento luhoso. Lula ta ninga di ta doño di e apartamento i ta bisa ku e kaso aki tin orígen polítiko. Un kompania di konstrukshon impliká den e skandal di Petrobras ta esun ku a konstruí e apartamento. A arestá i sentensiá diferente polítiko i ehekutivo di Petrobras despues di un investigashon anti korupshon. Inisialmente e investigashon tabata dirigí riba labamentu di plaka, pero a sali alegashonnan di un trama di korupshon kompleho na Petrobras kaminda tabata duna kontraktnan muchu karu a kambio di soborno. Den un konferensha di prensa fiskal Deltan Dalagnol a bisa ku Lula tabata e hefe grandi di e skandal di korupshon na Petrobras. "Lula a asigná diferente ehekutivo haltu na Petrobras, pa asina nan rekoudá fondo pa partidonan polítiko den e koalishon di gobièrnu pa medio di korupshon". Sin e poder di Lula su desishonnan e trama di korupshon aki lo no tabata posibel. Un kondena kriminal lo pone ku Lula e no por lansa su mes pa presidensía di 2018. Lula a yama e suseso un "espektákulo deplorabel". Lula i su kasá ta ninga di a hasi algu robes i a bisa ku no tin ningun prueba di e alegashonnan. Un hues lo dikta den e dianan benidero si lo bai pèrsigui Lula.

bottom of page