Trahadó di Royal Caribbean ta muri den ehersisio di reskate na Fransia.


“Un miembro di tripulashon riba e barku di turista di mas grandi na mundu a muri i kuater otro a resultá heridá djamars, ora ku un boto di salbabida a kai for di e bordo den laman, durante un ehersisio di prueba di reskate na Marseille” asina e operador di e kompania Royal Caribbean a deklará. Julien Ruas, e teniente alkalde di Marseille a bisa The Associated Press, ku e boto di salbabida a kai for di un haltura di masomenos 10 meter (33 pia) na e di 5 dèk di “Harmony of the Seas”. Den e boto tabatin sinku miembro di e tripulashon. El a identifiká e miembro ku a pèrdè su bida komo un Filipino di 42 aña. Sirkunstanshanan di e aksidente ainda no ta masha kla.

Pagadónan di kandela riba laman a bisa AP ku un persona a muri, dos ta gravemente heridá i dos otro a haña heridanan leve durante di e kaida violento. "Aparentemente e hendenan no a haña tempu pa sigurá nan mes bon, ku konsekuensha ku e kaída tabata unu hopi violento i komparabel ku por ehèmpel ora un hende kai for di un edifisio di 10 meter”, Ruas a sigui splika. E no por a bisa dikon e boto skapabida a lòs i kibra bai abou.

E liña krusero ku tin Miami komo base, a lamentá e morto i a bisa ku e insidente a tuma lugá durante un ehersisio di seguridat, ku e barku den haf di e siudat Mediteráneo. “Harmony of the Seas” di e kompania krusero Royal Caribbean, a debutá dia 17 di mei 2016, pa totalisá 25 barku den e flota di e liña. E barku a haña e título di e barku di turista mas grandi na mundu. Den verano e barku lo a nabega pa despues regresá e haf na Everglades den primavera.

Harmony of the Seas” tin e rèkòrt komo e barku krusero mas grandi ku a yega di konstruí, ku un kapasidat di 8.690 persona, di kual 6.300 ta pasahero i 2.390 ta miembro di tripulashon.

A konstruí e barku di 1 bion dòler na Fransia i a kuminsá su nabegashon na luna di mei di e aña aki. E barku tin 362 meter (1.187 pia) di largura, 16 piso haltu, loke ta mas haltu ku Toren di Eiffel. Nan ta kompará “Harmony of the Seas” ku un siudat flotante, ku mas di 2.500 kamber luhoso, 20 sitio pa por sena, 23 pisina, “water slides”, un parke ku mas di 10.000 mata i 50 palu, muraya ku por subi, klupnan nokturno, un teater, pista pa por “skate”, un vèlt di basket i un kasino.