Lidernan di frakshon a instruí gobièrnu pa bin ku un komishon di tres persona pa atendé e malkontent


Den un konferensia di prensa ku a tuma lugá den oranan di mèrdia, lidernan di frakshon a trese dilanti ku nan a firma un karta ku un proposishon pa gobièrnu bin ku un komishon pa diskuti e lei, ku ta motivashon dje wèlga general di awe. Segun lider di frakshon di partido Pueblo Soberano, Jaime Cordoba, di e forma aki nan ke duna un kontribushon pa trata na yega na un solushon den e situashon ku a surgi. Mas aleu Cordoba a splika ku nan a papia ku Promé Minister Whiteman riba e situashon, promé ku nan a yega na un desishon.

Alex Rosaria di Partido PAIS a splika ku no a publiká e lei ainda, pues e no ta komprondé e motibu pakiko mester a bin ku un wèlga general awe. Ademas Rosaria a splika ku debidamente partidonan a diskutí i aprobá e lei den dialogo nashonal. Tantu lider di PAR, Zita Jesus-Leito, lider di Partido Nashonal di Pueblo, Humphrey Davelaar, Glen Sulvaran a uni nan mes na e deklarashon di nan koleganan den frakshon. Finalmente Jaime Cordoba a splika ku den e karta ku nan tur a firma pa instruí gobièrnu tin pará ku nan ke pa gobièrnu bini ku un komishon di 3 persona pa atendé ku e situashon. Un persona den representashon di sindikatonan, un persona den representashon di gobièrnu i un persona imparsial ku ambos partido tin konfiansa aden.