
Mainta a habri ku wèlga general na Kòrsou i for di tempran por a kuminsá sinti e efektonan. Transporte públiko no ta funshonando, pues no tin bus. Varios negoshi i snèknan a keda será awe. AQUALECTRA For di tempran vários bario rònt Kòrsou a pèrdè koriente. Den un deklarashon na TeleCuraçao, bosero di Aqualectra a splika ku debí na falta di trahadó e kompania no por suministrá koriente. Pa masomenos 8or di mainta 50 pa 60% di Kòrsou tabata sin koriente. E situashon di awa tambe ta delikado, ségun e bosero. No por a duna un bista ainda riba kon e situashon di koriente lo sigui desaroyá. Algun bario ku for di tempran a pèrdè koriente :
Oost Janthiel Suffisant Grote Berg Brievengat Sun Valley Gato
Montaña
Brakkeput
Mon Repos
Jongbloed
Abrahamsz
Fortuna Ariba
Kwartje
Mundu Nobo
Mahuma
Schelpwijk
Groot Kwartier
Santa Rosa
Bonam
Sta.Maria Matansia Fuik HÒSPITAL Mientrastantu hòspital tin koriente i ta dunando kuido. Ademas a para vários operashon ku tabata planiá pa di e manera ei hòspital por ta prepará pa kualkier eventualidat. HAF Den haf tambe ta sinti efekto, debí ku barkunan no por drenta St.Annabaai. KORTE 8or di mainta a kuminsá un wisio sumario ku kontratistanan a entamá kontra e sindikato di trahadónan di Isla SGTK. Un poko mas lat 11or di mainta lo trata tambe e kaso ku sindikatonan a kuminsá kontra Minister di Hustisia debí ku pa medio di un dekreto e minister ke stroba e sindikatonan di manifesta, loke ta un derecho fundamental. Segun e konsehero sindikal Errol Cova nan a pidi wes pa pèrmití medionan di komunikashon pa transmití tratamentu di e kaso públiko. Wes a manda sindikatonan pa puntra minister pèrmit, pero minister a ninga e proposishon akí.