Segun e dòkter di Hillary Clinton e ta sufisiente fit i kapas pa tuma e puesto di presidente di Estádos Unídos. E kandidato pa presidensia merikano ta rekuperando bon. Segun dòkter Lisa Bardack, aparte di e pulmonia no a sali niun otro kondishon di preokupashon for di e tèstnan di Clinton. E demókrata di 68 aña ta den un bon kondishon. Dòkter di Clinton a duna diferente detaye tokante su salú pero no a duna informashon médiko ekstenso manera inisialmente e tim di kampaña a primintí. Dòkter Bardack a kontrolá Clinton sigur 4 bia e luna aki. E deklarashon di e dòkter ta pa desmentí e rumornan pa banda di republikanonan ku Clinton lo ta sufri di un pròp di sanger den su kabes. Na 2012 Clinton tabatin un pròp di sanger ku e konsekuensia ku e kandidato a haña un konmoshon selebral. Pero entretantu el a rekuperá kompletamente. Den fin di siman Clinton a sintié malu durante konmemorashon di e atakenan riba e Twin Towers na New York i a bisa despues ku tabata un pulmonia. Djaweps e lo sigui ku su kampaña despues di a tuma 3 dia di deskanso. E oponente di Clinton, Donald Trump a papia di su propio salú durante di The Dr.Oz Show. E la mustra e presentadó un dokumento ku su datonan médiko. Segun su dòkter e republikano di 70 aña ta den bon kondishon, no opstante ku e tin sobre peso i su kolèsteròl ta muchu haltu.