Opsishon na Venezuela ta akusá Presidente Venezolano, Nicolás Maduro di a militarisá Isla Margarita pa fungi komo amfitrion pa e di 17 Kumbre di Movimentu No Aliniá. Maduro a gasta masomenos $120 mion pa risibí e grupo di 120 miembro di paisnan partisipante, mientras ku Venezuela ta meimei di un krísis ekonómiko. E konferensia a kuminsá djamars na Isla Margarita i ta finalisá djadumingu. Promé ku e kumbre kuminsá, Maduro a usa 14.000 trupa di Forsa Armá Nashonal Bolivariano i polis di inteligensia na e isla. Entre e medidanan di seguridat, ku lo dura por lo ménos te djadumingu, militarnan venezolano a limitá buelonan, akseso na hafnan i a será playanan, restorantnan i benta di marisko. Oposishon a lansa akusashon fuerte kontra presidente Maduro pa e hecho akí. Según un informe di Prensa Presidensial Venezolano, e evento prinsipal ta tuma lugá djasabra, na momentu ku ofisialnan, inkluso hefenan di estado, topa otro pa diskutí tópikonan manera pas i desarmamentu. A funda e Movimentu No-Aliniá na Yugoslavia na 1961, komo grupo di di nashonnan No Aliniá ofishalmente ku sea parti Ost òf Wèst di e Guera Friu. Paisnan miembro ta inkluí aktual presidente di NAM (Non-Aligned Movement) Iran, Colombia, Suráfrika, Cuba, Saudi Arabia, Vietnam, Jamaica i Belarus, ku ta e úniko miembro di Europa. Lidernan di oposishon na Venezuela ta akusá Maduro di a gasta inhustamente $120 mion pa organisá e kumbre, miéntras e pais ta enfrentá un krísis ekonómiko serio, ku hopi skarsedat di kuminda i produktonan básiko. Nan ta mira e medidanan di Maduro na e isla, komo un militarisashon ilegal, ku ta hasi daño na e poblashon lokal dje isla ku ta dependé di turismo.