Lo investigá kousa di kandela na Sentro Pro Arte.


Investigashon lo mester determiná si e kandela ku a destruí Sentro Pro Arte tabata intenshonal òf ku ta pa motibu di otro kousa. Komandante di brantwer Elvin Regina no kier a duna komentario pero si el a indiká ku e edifisio no tabatin koriente. Pa e motibu akí por asumí ku a sende e kandela. No por a hasi masha pa reskatá e edifisio. E úniko kos ku brantwer por a hasi ta kontrolá e kandela pa e no ekspandé. Segun Regina no tabata responsabel pa laga bomberonan drenta e edifisio. Esaki lo tabata demasiado peligroso. Kontrario na rumornan, no ta asina ku tabatin eskases di awa, simplemente na yegada di bomberonan a tuma nota ku no por a hasi muchu pa salba e edifisio. Un adikto aparentemente lo tabata biba den e edifisio pero no ta konosí si e lo ta esun responsabel pa e kandela. Hopi ta esnan tambe ku a insinuá ku un òf mas wèlguista lo ta envolví den e kimamentu. E sindikatonan sin embargo ta desmentí esaki. Investigadónan tékniko di polis lo mester hasi un investigashon pa determiná e kousa eksakto. Algun kompania den bisindario a tuma prekoushon ya ku posiblemente asbèst lo a bin liber pa motibu di e kimamentu. A opta pa laga trahadónan keda kas.