Apple tin ku paga Komishon Europeo 13 mil mion euro na interes di impuesto atrasá na Irlanda. Segun un komishon e akuerdo di impuesto entre Apple i Irlanda no ta bálido. E komisariado di EU a bisa ku esaki no ta un but, pero impuesto ku e kompania falta pa paga ainda. Dor di e akuerdo entre gobièrnu irlandes i Apple, e kompania tabata paga efektivamente na 1% di impuesto riba su ganashinan na Europa na aña 2003 i na 2015 e porsentahe tabata 0.005%. Esaki ta igual na 50 euro pa kada mion euro. E akuerdonan ta bai bek te aña 1991. Na 2007 a sera akuerdonan nobo. Esaki te ainda ta e imposishon (naheffing) mas grandi ku Komishon Europeo a imponé riba un kompania. Aktualmente e komishon ta hasiendo investigashon tambe di e akuerdo di impuesto entre Luxenburg i McDonalds. Anteriormente Starbucks tambe mester a paga 30 mion euro na impuesto na Hulanda. E sentensia di Komishon Europeo ta resultado di un investigashon ku a kuminsá na 2014. A akusá Irlanda di transgredí reglanan europeo paso e pais a permití Apple paga ménos impuesto pa asina evitá pèrdida di kuponan di trabou. Apple tin sigur 5.500 trahadó na Irlanda, ku ta un kuart di tur e trahadónan europeo dje kompania. Na 2015 e kompania tabatin un ganashi di 53.8 mil mion dòler.