Djadumingu awor lo kanonisá Mama Teresa di Kalkuta. Kanonisashon ta e akto den kua iglesia katóliko ta deklará un persona ku a fayesé komo santu. E ganadó di premio Nobèl i humanitario ku a biba mayoria di su bida na India kaminda e ta sumamente popular lo ser deklará komo santu di iglesia katóliko dor di Papa Francisco. Eaki ta sosodé ménos ku 20 aña despues ku el a fayesé. Esaki ta un periodo relativamente kòrtiku, ya ku e proseso di kanonisashon por tuma siglonan. Pa katólikonan Mama Teresa ta altamente atmirá pa su trabounan ku el a hasi na e siudat di Kalukta na India. Diferente funshonario haltu di India lo biaha pa Vatikano pa presensia e akto. Mama Teresa a nase na Skopje, aktualmente Masedonia, na aña 1910. Ku 18 aña el a disidí ku e ke bira un mishonero i a drenta un kombento Irlandes, kaminda el a haña e nòmber Maria Teresa. Algun luna despues, na edat di 19 aña, el a bai biba na India. El a duna lès na pobernan i kura hende malu. Na 1979 el a risibí e premio Nobèl di pas. Na momentu di su morto, Mama Teresa tabatin 4000 hende ta traha bou di dje den 610 fundashon na 123 pais. No opstante esaki e trabounan di Mama Teresa a haña hopi krítika tambe. A kuestioná e falta di higiena i kuido médiko na e diferente kasnan di kuido ku e tabata manehá. Krítikonan a kuestioná tambe sierto milagernan ku ta ser atribuí na dje dor di Vatikano. Mama Teresa a fayesé 5 di sèptèmber 1997 na India.