Ku plaser e organisashon di CNSJ a anunsiá e remplasante di Burt Bacharah. Ilan Chester lo ta riba “stage” Celia riba djasabra 3 di sèptèmber.
Ilan Chester a nanse na Israel i a krese na Venezuela. Na 2010 e la gana un Grammy Award i ta un kantante multi talentoso. E ta kantante i kompsitor ku vários komposishon musikal riba su nòmber.
Ilan Chester a krese ku influensia di melodianan Franses, Judiu i Italiano ku el a ta tende tempu ku e ta mucha. Despues el a haña mesun amor pa R&B merikano (Stevie Wonder, Ray Charles) i e rock ingles (The Beatles, Yes, Jethro Tull). Asina e la desaroyá su músika i esaki ta kontené elementonan di músika klásiko, “jazz”, afro karibense i músika tradishonal di Venezuela. Komo èks miembro di grupo di rock i pop manera Trams, Way i Melao, Ilan Chester a graba 4 disko pa merkado ingles.
Na inisio di su karera komo solista na 1983, Ilan Chester a bira un artista masha kerí na Venezuela i den henter Latino Amerika. E tabata yena salanan i teatronan grandi. Despues di algun disko memorabel, entre kua Amistad, Solo Faltas Tu, Asi i Cancionero del Amor Venezolano, volumen 1,2 & 3 el a haña mas atenshon internashonal ku e disko titulá “Corazon Navideño” ku a gana disko di platino i tambe e kolekshon di 6 disko titulá “Tesoros de la Musica Venezolano”. Di e produkshon akí el a bende na Venezuela so, mas ku 500.000 kopia den algun siman.
Rònt mundu krítikonan i otro artistanan ta rekonosé Ilan Chester komo un dje kompositor i kantantenan mas talentoso na Spaño. Kantantenan famá manera Marc Anthony, Cheo Feliciano i Chayenne a yega na interpretá su kansionnan i rònt mundu e tin masha hopi fanátiko.