Nicki Minaj lo presentá huntu ku Ariana Grande den VMA’s di MTV na Merka.


Djadumingu anochi, Ariana Grande i Nicki Minaj, lo duna un presentashon huntu durante di Video Music Awards (VMA's) na Merka. E kanal di müzik MTV a anunsiá esaki nèt promé ku fin di siman. Nan dos lo interpretá e kansion “Side to Side” for di album mas resien di Ariana Grande titulá “Dangerous Woman”. E show di galardón di MTV lo tuma lugá na New York. Ya tabata konosí tambe ku Britney Spears lo presentá pa promé bia bèk riba tarima di MTV, despues di kasi 10 aña di ousensia.

Rihanna tambe lo tei riba e anochi di premiashon. Lo onra talentoso hóben artista di Barbados, ku e Galardon Michael Jackson Vanguar. Esaki ta e premio di karera ku e kanal ta entregá kada aña. Riba dia di e show, Minaj i Grande lo saka un video. Esaki lo no ta e promé bia ku e dos artistanan ta kompartí esenario durante di Video Music Awards. Na 2014, huntu ku Jessie J nan a kanta un medley di e hit “Anaconda” di Minaj, “Break Free” di Ariana Grande i e kansion di nan huntu “Bang Bang”.