E instituto di estudio di fishi Feffik a haña 750 inskripshon e aña eskolar aki. Na momento ku e direktiva aktual a asumí e kargo na 2014 tabatin solamente 216 inskripshon i aña pasa 690. No opstante e situashon prekario na e instituto, tòg e direktiva por papia di un bon komienso di e aña eskolar. For di momento ku a instalá e direktiva nobo a purba trese òrdu riba diferente tereno. Asina por ehèmpel ta publiká e estado finansiero anualmente. Entre aña 2000 pa 2013 no a publiká relatonan anual. Durante e periodo ei, e direktiva nobo a konstatá tambe, ku no tabatin un maneho finansiero konkreto. No tabata paga primanan ni impuesto, loke awor a kuminsá pasa a trobe. E situashon anterior a trese kuné un debe di mas o ménos 20 mion florin. E 4.5 mion florin ku ta risibí di supsidio ta nèt pa paga e kostonan operashonal. Entre tantu a kuminsá baha gastunan di personal i utilidat. Últimamente gobièrnu a disidí di kuminsá un reorganisashon kaminda no a inkluí e direktiva ni sindikatonan.