Awe e legendario kantante mehikano Juan Gabriel, nasí Alberto Aguilera Valdez a fayesé na Santa Monica, California. E promé indikashonnan ta ku e kantante a fayesé di un atake di kurason. Juan Gabriel a kaba di duna un presentashon djasabra anochi, den kuadro di su gira titulá “Mexico Es Todo”. Den oranan tempran di dia, e ekipo di Juan Gabriel a anunsiá ku e ta kanselá su gira. Un poko mas despues e periodista Maria Patricia Castañeda, a aunsiá e fayesimentu di artista via su kuenta di Twitter. Juan Gabriel tabata malu kaba, durante e último lunanan. Famianan tambe a konfirmá fayesimentu di e artista. Klek riba foto pa mira reportahe di Univision.
Djasabra anochi Juan Gabriel a presentá dilanti di un públiko di mas ku 17.500 persona ku a mira su konsierto na Inglewood Forum, na California. Djadumingu mainta, outoridatnan mester a duna asistensia na kas na Santa Monica, kaminda a konstata morto di artista. No tin sospecho ku lo por ta trata di un krimen, sino mas bien ku e kantante a fayesé debí na kousanan natural. Despues di fayesimentu di Juan Gabriel, vários artista a reakshoná via retnan sosial. Entre otro Ricky Martin, Juanes, Carlos Vives, Enrique Iglesias, Luis Fonsi i Gente de Zona tabata e proménan ku a lamentá fayesimentu di e gran kantante.
Juan Gabriel, ku tabata konosí tambe komo “El Divo de Juarez” a yega di bin Kòrsou na ún okashon so. Tabata na aña 1994 ku e promotor Steve Hudson a trese e gran artista for di México, pa duna un konsierto den aire liber. E konsierto a tuma lugá riba e lugá di parker outo parti p’ariba di W.T.C., kaminda aktualmente tin Hotel Clarion. Na e okashon ei, e artista a presentá ku orkesta i su mariachi, manera ta kustumber. E tempu ei, mas ku 9000 hende a mira e presentashon di Juan Gabriel na Kòrsou. Na Mart di e aña aki tabata e último biaha ku Juan Gabriel a bishitá nos islanan, ora el a duna un konsierto na Aruba. E último konsierto ku Juan Gabriel a duna na Aruba, a tuma lugá riba Harbour Arena kaminda ta tene e popular festival Aruba Latin Music. Pa e okashon aki, tabata e hóben promotor Darren van Ommeren ku a asistí e organisashon, pa realisá e konsierto.
Juan Gabriel a produsí mas ku 1800 kansion durante su karera, entre kua éksitonan grandi manera, “Hasta Que Te Conoci”, “Siempre En Mi Mente”, “Noa Noa”, “Meche” i “Querida”. Resientemente Juan Gabriel a kaba di lansa un tema promoshonal ku Marc Anthony titulá "Yo Te Recuerdo".
[if !supportLineBreakNewLine] [endif]