Den presensia di su ekselensia Gobernadó Sra.Lucille George Wout a tuma lugá na Biblioteka Nashonal Kòrsou apertura ofisial di e eksposishon dediká na George Maduro. George John Lionel Maduro a nase na Kòrsou di 15 di yüli 1916 (100 aña pasá). Na1926 (10 aña) ela bai biba na Ulanda sin su mayornan. Tabata e intenshon pa e bai studia i bin Kòrsou bèk pa sigui su karera den e negoshi di famia Maduro & Sons.
Na 1940, el a lucha balentemente kontra e Nazinan na Ulanda. Ta konsiderá Maduro komo un héroe grandi (“verzetstrijder”). Bou di su mando a rekapturá Villa Leeuwenbergh na Leidschendam, ku e tempu ei tabata bou di kòntròl di alemannan. Ademas nan a kue vários parakaidistanan aleman prezu durante e bataya. Nazinan a kapturá Maduro i e mester a sirbi finalmente den un kampo di konsentrashon na Dachau, kaminda el a muri na un edat hopi yòn, 28 aña. Riba inisiativa di su mayornan a konstruí Madurodam (siudat miniatura) na Den Haag.
Durante e atardi di apertura na Biblioteka Nashonal Kòrsou a hiba palabra, Gobernadó Sra.Lucille George-Wout, un militar komo representante di Ulanda i direktor di Biblioteka Nashonal Kòrsou, Gerda Willems. E eksposishon ta dura te 31 di desèmber 2016 i entrada ta grátis. Hende grandi por bishita e eksposishon entre 2or pa 6or di atardi, mientras ku parti di mainta tin oportunidat pa skolnan por bushitá e eksposishon.
