Avion di e popular kantante kolombiano di reggaeton J Balvin a aksidentá na Bahamas djabièrnè den ora di atardi. E avion privá ku J Balvin i su famia tabata na punto pa lanta buelo for di aeropuerto di Bahamas na momentu ku e aksidente a tuma lugá. “Dios no tabata ke pa mi bai awe”, J Balvin a skibi riba su kuenta di Twitter. El a pone tambe un video kaminda por mira klaramente kon e avion a keda pegá den un mondi den serkania di e aeropuerto di Bahamas. “Dia no ta bo dia, no ta bo dia”, J Balvin a sigui splika.
J Balvin di 31 aña a bira super popular den e género di músika latino ku su hit “Ginza”. Na su edat hóben, ya e kantante tin vários premio importante riba su nòmber. Aña pasá el a keda premiá ku un Latin Grammy pa e mihó kansion urbano. E aña aki tambe e artista a gana no ménos ku 5 premio durante e prestigioso anochi di Premio Lo Nuestro, ku ta un di rekonosimentu prinsipal di artistanan latino. J Balvin ta programá pa presentá djasabra dia 3 di sèptèmber awor na Kòrsou, durante di Curacao North Sea Jazz 2016. Klek riba foto pa e video ku J Balvin a pone riba Tiwtter.
