Churandy Martina ta sera temporada ku rèkòrt ulandes nobo.


Churandy Martina ta sera temporada den gran forma. Algun siman pasá durante weganan olímpiko na Rio, Churandy a kore e trajekto di 200m den un tempu di 20.13 sekònde, ku apénas algun frakshon di sekònde dje medaya di bròns. Awe el a drecha su tempu personal i pone un rèkòrt ulandes nobo, koriendo 19.81 sekònde na Lausanne. “Den 2016 mi tabatin hopi momentu bon i malu, pero mi ta kontentu ku e desaroyo aki. Un rèkòrt nashonal na final di temporada, kiko mas mi por ke”, Churandy a bisa, ku su smail tradishonal. Durante e kareda na Suisa, Churandy a kore bai laga e panameo Alonoso Edward (19.92) i e hamaikino Julian Forte (20.16).