A haña etikèt robes riba pòchi di remedi di Prince.


Den e píldoranan, ku nan a haña durante e investigashon den kas di Prince pa sa e kousa di su morto, tabatin e supstansia fentanyl. Pero riba e etikèt tabatin nòmber di otro supstansia. E supstansia adiktivo fentanyl ta kasi sinkuenta biaha mas fuerte ku morfina.

Un fuente di The Guardian ku ta envolví den e investigashon a konfirmá esei. A haña e píldoranan den un pòchi ku hydrcodone riba e etikèt skibí, un remedi kontra doló ku por kumpra na botika. Outoridatnan no sa ta di unda e píldoranan a bin. Segun e fuente, nan ta suponé ku e kantante no tabata sa ku e píldoranan tabata kontené e supstansia fuerte akí. Prince no tabatin resèpt pa e remedi akí. Segun Star Tribune ta konsiderá fentanyl ilegal komo ‘un krisis nashonal’. Na Estados Unidos, e supstansia akí ta kousa di un subida alarmante di sobredósis fatal. Sa meskla fentanyl hopi biaha ku heroina òf ta bendé tambe komo droga.

Riba 21 di aprel a haña Prince den e left di su finka Paisley Park i e no tabata duna señal di bida.

Segun esnan yegá na e artista, e tabatin un sita ku dòkter su siguiente dia, pa motibu di su adikshon na remedinan kontra doló. Segun Star Tribune a haña e músiko ku su paña bistí dilanti patras i probablemente ya e tabatin seis ora morto na momentu ku nan a hañ’é.